ஜீவ நாடி இரகசியங்கள்- பகுதி 2

சித்தர்களைப் புரிந்து கொள்வதும், சித்தர்களின் அருள்வாக்கை ஜீவ நாடியில் புரிந்து கொள்வதும் அவ்வளவு எளிதானதில்லை. குருவருள் வேண்டும். “குரு தொட்டுக் காட்டாத வித்தை சுட்டுப் போட்டலும் வராது”. குரு இல்லா வித்தை பாழ். தகுந்த குரு மூலம் உபாசனை செய்யச் செய்ய அருள் வாக்கு ஞானம் ஏற்படுகிறது. ஒருவர் வந்து எதிரிலே அமர்ந்த்வுடன் அவரது முக்காலமும் உணர்த்தப்படுகிறது. இந்த மாதிரி சித்திகளை ESP என்று ஆங்கிலத்தில் அழைத்து மகிழ்கிறார்கள். 

மனதைக் குறிக்கின்ற கிரகம் சந்திரன்.அந்த கிரகம் சுப பலம் பெற்று இருந்து மனதைக் குறிக்கும் 5ஆம் இட அதிபதி 8ஆம் இடத்தில் தொடர்பு கொண்டு, 5ஐ குரு பார்க்க இருக்கின்ற ஜாதகர்கள் அமானுஷ்ய ஆற்றல்களையும், அஷ்டமா சித்திகளையும், வருங்காலம் உரைக்கின்ற வலிமைகளையும், ஆவிகளுடன் பேசி அனைத்தும் அறிகின்ற சக்திகளையும், மகான்களுடன் சூட்சுமத்தில் தொடர்பு கொள்ளும் மகத்துவம் உணர்த்தும் இரகசியங்களையும், சித்தர்களோடு தொடர்புக் கொண்டு சிறப்பான பலன்களை உரைக்கும் வலிமையும் பெறுகிறார்கள். 

இதனுடன் 9ஆம் இட அதிபதியும், 9ஆம் இடமும்  கைகோர்த்து செயல்பட்டால் பல விசேஷ சக்திகளைப் பெற்று எல்லா தெய்வங்களுடனும் உரையாடி உற்ற நலங்களைப் பெறும் நிலைகளை நிச்சயம் அடைந்தே தீருவர் என்பது ஜோதிட நியதி.   

ஒரு சிலருக்கு இயற்கையாகவே இத்தகைய அதிசய சக்தி அமைந்துவிடுவதும் உண்டு. இன்னும் சிலர் உபாசனை மூலம் உயர்ந்த சித்திகளை அடைந்து உயர் சாதனைகளை ஊரரிய உலகறியச் செய்து அழியாப் புகழ் பெறுகின்றனர். இத்தகைய நிலையில் இருப்பவர்கள் விளம்பரத்தை விரும்புவதில்லை.

எனது குருநாதர் எலுமிச்சம் பழத்தை வைத்தே வர்த்தமானங்களைத் திறம்பட உரைத்துவிடுவார். ஒருமுறை அடியேன் எலுமிச்சம்பழத்தை நேரடியாகச் செடியில் பறித்தேன். நறுக்கென முள் தைத்தது. சரி என விட்டுவிட்டேன். அந்தப் பழத்தைக் கொண்டு போய் குருநாதரிடம் பூஜைக்குக் கொடுத்துவிட்டேன். இரவு பூஜைகளை முடித்து அருள்வாக்கு சொல்ல அமர்ந்தார் குரு. இரவு 2 மணி இருக்கும். நான் அயர்ந்து தூங்கிவிட்டேன். என்னை அருள்வாக்கில் அழைப்பதாக வந்து அழைத்துச் சென்றார்கள். அடடா தூங்கி விட்டோமோ என்று பரபரப்பாக எழுந்து குருவின் முன்பு சாஷ்டாங்க நமஸ்காரம் செய்தேன். குரு கேட்ட கேள்வி என்னை மெய் சிலிர்க்க வைத்த்து. என்னப்பா இந்த எலுமிச்சம் பழம் பறிக்கும் போது முள் ஏறியதோ? அது இன்னும் வலிக்கிறதா? எனக்கு மயக்கமே வந்துவிடும் போல் இருந்த்து. ஆழமான ஆழ்மனதில் குருவருள் தைத்தது. இது எப்படி சொல்ல முடிந்தது? ESP ஆக இருக்குமோ? இப்படி பல கேள்விகள் என்னுள் எழுந்தன.போகப் போகப் புரிந்து கொண்டேன். 

வந்து பேசுவது சாட்சாத் முருகப் பெருமானே என்று குரு புகழ் பாடப் பாட திருவருள் கைகூடியதை உணர்ந்தேன். இப்போது ஜீவ நாடி படிக்கின்ற அளவிற்கு முருகன் எனது குரு மூலமாக ஏராளமான விளையாடல்களைச் செய்து வருகிறார். தீட்சை வாங்கி மந்திர பயிற்சி செய்து வரும் காலங்களில் குரு என்னுள் இருந்து பேசினார். அதே குரல். அதே பாடல் வடிவில் அருள்வாக்கு. அதிர்ச்சியிலும், பக்தியிலும், பக்தர்கள் கூட்டம் சூழ்ந்து கொண்டது. 

"16 வயதில் தொடங்கியது" ஆன்மிகச் சேவை. அதீத வாக்குப் பலிதத்தினால் ஞானஸ்கந்த மூர்த்தி ஜீவநாடி கை கூடியது. அமாவாசை தோறும் அதை ஞானஸ்கந்த மூர்த்தியின் திருப்பாதங்களில் வைத்து விட்டால் அந்த மாதத்தில் யாரெல்லாம் தேடி வருவார்கள் என முருகன் உரைத்திடுவார். அதே போல் வருவார்கள். இந்த மாதம் இந்தந்த நட்சத்திரக்காரர்களுக்குப் படி என்பார். அதே போல் அந்தந்த நட்சத்திரம் உடையவர்கள் வருவார்கள். நாடியில் என்ன வருகிறதோ அதை மட்டும் உரைக்கின்ற கருவி மட்டுமே அடியேன். என்னை நெருங்கி நற்பலன் அடைந்தவர்களும் இந்த பத்திரிக்கையைத் தொடர்ந்து படிப்பதால் இல்லாத ஒன்றை இட்டுக்கட்டிக் கூற முடியாது. இருப்பதை இனிமை வடிவில் உண்மை மாறாமல் எடுத்து இயம்புவதே எமது பணி.

அன்று ஒரு நாள் அமாவாசை திதி. பூஜைகளை முடித்து விட்டு, அடியார்களுக்கு அன்னதானம் அளித்து விட்டு அருள்வாக்கு மேடையில் அடியார்களோடு அமர்ந்தேன். நல்ல கூட்டம். வந்திருந்த அனைவரும் முருகன் யாருக்கு நாடி படிக்கப் போகிறார் என்று ஆவலோடு காத்திருந்தார்கள். சுவடியைப் பிரித்தேன் ரேவதி நட்சத்திர காரர்களுக்குப்படி என வந்தது. வந்திருந்த அத்துனை பேர்களில் ரேவதி நட்சத்திரம் உடைய ஒரே ஒரு பெண்மணி மட்டுமே இருந்தார். அவருக்கு மட்டுமே அன்று நாடி, தேடி வந்தது. யாருக்கு முருகனின் ஆசியும் சித்தர்களின் ஆசியும் இருக்கிறதோ அவர்களுக்கே ஸ்ரீஞானஸ்கந்தர் ஜீவநாடியில் அருள்வாக்கு வருகிறது. அதனால்தான் இதைத் தொழிலாக யாம் செய்வதில்லை. படித்த படிப்பு வேறு, செய்கின்ற தொழில் வேறு இது ஒரு ஆன்மிகச் சேவை அவ்வளவே. ஒரு குறிப்பிட்ட நபர்களுக்கு மட்டுமே படிக்க நேர அவகாசம் இருப்பதால் இதை விளம்பரம் செய்வதில்லை.

வந்திருந்த பெண்மணிக்கு இரண்டு மாதத்திற்கு ஒரு முறை சிறுநீரகக்கல் வந்து வலி உயிர்போகும் அளவு வலிக்கும். பார்க்காத வைத்தியம் இல்லை. போகாத டாக்டர் இல்லை. எப்படி இரண்டு மாதத்திற்குள் கல் உருவாகும். குழம்பிய நிலையில் குடும்பமே இருந்தது. அந்த அம்மையார் ரேவதியில் பிறந்ததால் அன்றைய நாடி அவருக்கு வந்ததால் பாதி நோய் சரியான மாதிரி உணர்வு. சரி முருகன் என்ன உரைத்தார்.

“பழனிமலைப் பரமனின் அருளாலே

பாரினில் வந்துதித்தாள்

பத்தினியாய் வாழ்வாள்

தீர்க்க சுமங்கலியாய் இருப்பாள்

கைராசிக்காரி என்று

கச்சிதமாய்ப் பெயரெடுப்பாள்

இடையில் வருகின்ற வலிக்கு

வருத்தம் கொண்டிடுவாள்

வாட்டம் அடைந்திடுவாள்

குடிக்கின்ற தண்ணீரை மாற்று

குறை போம்….”

இதில் ஆச்சரியம் என்னவென்றால் இந்தப் பெண்ணின் தந்தையார் சிறு வயது முதலே பழநிக்குக் காவடி எடுத்துச் சென்றவர். அந்த அருளிலே பிறந்தவர்தான் இந்த அம்மையார். கணவனுடன் இதுவரை சிறு சண்டை கூட போட்ட்தில்லை பத்தினியாகவே வாழ்கிறார். சதி&பதி ஒற்றுமையில் வள்ளுவர் – வாசுகி. இப்படி பெயர் எடுத்த தம்பதி. இந்த அம்மையார் கையில்தான் முதல் பத்திரிக்கை வைப்பார்கள் திருமணத்திற்கு. கைராசிக்காரி என்ற பெயரும் உண்டு. இடையில் வருகின்ற வலி என்பதற்கு இரண்டு பொருள் உண்டு. ஒன்று இடை என்ற இடுப்பில் வருகின்ற வலி. மற்றொன்று இடைபட்ட காலத்தில் வருகின்ற வலி. அதற்கு அந்த அம்மையார் சிறு நீரகக் கல்லால் அவதிப்படுவதாக உரைத்தார். அதற்கு மருத்துவம் என்னவெனில் குடிக்கின்ற தண்ணீரை மாற்றுவதுதான். சித்தர்கள் எப்போதுமே சூட்சுமமாகவே உரைப்பார்கள். குடிக்கின்ற தண்ணீர் இந்த அம்மையாருக்கு அலர்ஜியாகி சிறுநீரகக் கல்லாகி விடுகிறது.  இதை எந்த மருத்துவராலும் கண்டுபிடிக்க முடியவில்லை. 

ஒரே நொடியில் ஸ்ரீஞானஸ்கந்தர் ஜீவநாடியில் விடை கிடைத்துவிட்டது. உடனே அவர்கள் தண்ணீர் வடிகட்டி ஒன்றை வீட்டில் வைத்தார்கள். முருகப் பெருமான் இன்னும் சில மூலிகைகளை உரைத்து அதைப் பயன்படுத்தும் முறையையும் அறிவித்தார். அந்த மூலிகைக்கு சூட்சும்மாக வெள்ளை மருந்து என்று பெயர். அதையும் முறைப்படி செய்தார். 

தற்போது வலி எங்கோ போய்விட்டது. ஆச்சரியம், அதிசயம், அற்புதம் இப்படி சொல்லிக் கொண்டே போகலாம். இதைப் படித்த உடனே நமக்கும் இதுபோல் பிரச்சினை தீரும் என வாசகர்கள் நினைப்பது இயற்கையே. உத்தரவு வந்தால் மட்டுமே அடியேன் ஜீவநாடி வாசிப்பேன். எனவே அதை மனதில் வைத்துக் கொள்வது நல்லது. வருகின்ற அத்தனை பேருக்கும் உரைக்க முடியாது. யாருக்கு ப்ராப்தம் இருக்கிறதோ அவருக்கு 100% சரியாக வரும்.

ஜீவநாடி ரகசியங்கள் பகுதி-1

" ஓம் ஸ்ரீ ஞானஸ்கந்தர் ஜீவநாடியின் ரகசியங்கள்"

ஒவ்வொரு மனிதனும் ஏதோ ஒரு வகையில் தமது எதிர்காலத்தைத் தெரிந்து கொள்ள வேண்டும் என்று ஆர்வம் காட்டுகிறான். தமது எதிர்காலம் எப்படி இருக்குமோ என்ற அச்சமட்டுமில்லாமல் அதையும் தாண்டிய ஒர் ஆர்வமும் காரணமாக அமைகிறது. அப்படி எதிர்காலத்தை சகுனங்கள், நிமித்தங்கள், ஆருடங்கள், பட்சி சாஸ்த்திரங்கள், ஜோதிடம், அருள்வாக்கு, கைரேகை, பிரஸ்னம், ஒலைச்சுவடிகள், எண்கணிதம், டாரெட் அட்டைகள், சோழிப் பிரஸ்னம், தாம்பூலப் பிரஸ்னம், அஷ்டமங்கலப் பிரஸ்னம், குறிகேட்டல், பூ வைத்து கேட்டல், பல்லி மூலம் பலன் காணுதல், கனவு மூலம் பலன் காணுதல், என நீண்ட பட்டியலில் அவரவர்க்கு ஏற்படும் அனுபவங்கள் மூலம், ஏதோ ஒரு வகையில் எதிர்காலத்தைத் தெரிந்து கொள்கிறான்.

 இதில் ஏராளமான இரகசியங்கள் பொதிந்து கிடக்கின்றன. அவைகள் மூலம் தீர்க்க தரிசனம் தந்திடும் அதிசயங்கள் நடந்து கொண்டு குறிப்பாக ஒரு மனிதன் ஏதாவது ஒரு வகையில் ஜோதிடத்தை நாடாமல் இருப்பதில்லை. “ஜோதிடம் பொய்ப்பதில்லை ஜோதிடன்தான் பொய்யாகிறான்” என்ற பழமொழி பலராலும் சொல்லப்பட்டு வருகிறது. 

குறிப்பாக எந்த ஒரு வகையில் தீர்வு காண முற்படும்போது அவர் செய்த நல்ல வினைகளும், தீய வினைகளுமே ஜோதிடர் மூலம் பலனாக வெளிப்படுகின்றன. ஒரு மிகப் பெரிய ஜோதிடராக இருந்தாலும் ஒரு சிலருக்கு எந்த பலனையும் சொல்ல முடியாமல் தடுமாற்றம் அடைகின்றனர். அதற்க்கு காரணம் ஜோதிடரின் குறையல்ல. வந்து 

கேட்பவரின் கர்மவினையே வெளிப்படுகின்றன.

தனது கர்மவினையைத் தீர்த்துக் கொள்ளவே ஜோதிடரை நாடுவதாகக் கூறும் நபர்கள் சரியான பாதையில் செல்கிறார்களா என்பது சந்தேகமே. அது என்ன சரியான பாதை என்றால், கடவுள் சிலருக்கு சிலர் மூலமே தீர்வு வைத்திருப்பார். அதாவது சரியான முறையில் சரியான நபரிடம் சென்று பொறுமையாக அவர் சொல்வதை தனது வாழ்வில் கடைபிடித்து வந்தால் முதலில் அவரது கர்மவினை தீரும். அதன் பின்பு வாழ்வில் வசந்தம் ஏற்படும்.

எந்த ஒரு ஜோதிடரிடமோ அல்லது மகானிடமோ சென்ற உடனேயே அதிசய மாற்றங்கள் நிகழ வேண்டும் என்று எதிர்பார்த்தால் ஏமாற்றமே மிஞ்சும். தடுமாற்றமே தன்னிலை மறந்து முன்னிலை வகிக்கும் அவரவர் கர்மவினை நன்றாக இருந்தால் ஒழிய அதிசயம் நடப்பது அபூர்வம்.

“ஜென்னீ ஜென்ம சௌக்யானம் வர்த்தினி

குலசம்பிரதாம் பதவீபூர்வ புண்ணியானாம்

லிகியதே ஜென்ம பத்திரிகா”

எல்லா ஜாதகத்திலும் எழுதப்படுகின்ற ஸ்லோகம் இது. பூர்வ புண்ணிய பாவங்களை படம் பிடித்துக் காட்டும் கண்ணாடியே ஜாதகம். ஜாதகத்தில் 9 கிரகங்கள், 27 நட்சத்திரங்கள், 12 இராசிகள், இவைதான் பூர்வ ஜென்மத்தைக் காட்டும் கருவிகள். ஆனால் இன்றைய மக்களின் ஆர்வம் ஜீம்பூம்பா மேஜிக் மாதிரி உடனடியாக எல்லாம் நடக்க வேண்டும் என்ற வகையில் இருப்பதால் பொறுமை என்பது இல்லாமல் போய் வறுமையில் வாட வேண்டியதாகிறது. ஒரே ஜோதிடரை நம்புவதில்லை. பல ஜோதிடப் புத்தகங்களைப் படித்தும் குழப்பம் தீர்வதில்லை. 

அதேபோல் பாவத்திற்கு பரிகாரம் செய்ய வேண்டும் உடனடியாக பலன் வேண்டும் என்று கேட்கிறார்கள்.இப்படிப்பட்ட மன நிலையில் உள்ளவர்களை சிலர் பண ஆசைக்காக தவறாகப் பயன்படுத்துகிறார்கள். 

இந்தப் பொருள் வைத்துக்கொள் அதை வாங்கிக் கொள் என்று வியாபாரம் செய்கிறார்கள். இதில் உண்மையும் இல்லாமல் இல்லை. மக்களிடம் பொறுமை இல்லை. எனக்கு ஒரு வயதான முதியவர் அலைபேசியில் தொடர்பு கொண்டார். ஒரு ஜோதிடரை அணுகி ரூபாய் ஆயிரம் கொடுத்து யங்திரம் வாங்கினேன் 90 நாட்கள் ஆகிறது எந்த பலனும் இல்லை. பணத்தை திருப்பிக் கேட்டேன் தரமாட்டேன் என்கிறார். திருவருள் சக்தி ஆசிரியரிடம் பேசினேன். உங்களிடம் பேசி உரிய விளக்கம் பெற வலியுறுத்தினார். நான் சென்றது தவறா? நான் இப்பொழுது என்ன செய்வது என்றார்? அவர் பிறவி முழுவதுமே கஷ்டத்தில் இருப்பதாகச் சொன்னார். அவரது மகனுக்கு கேன்சர், மகளுக்குத் திருமணம் ஆகவில்லை. மனைவியும் படுத்த படுக்கை. அவர் மன நிலை என்ன பாடுபடும்.

உண்மைதான் பிறவி முழுவதும் பிரச்சினைகளில் உழன்றவர் அவரது குடும்பமே பாதிப்பாக இருக்கிறது. இது நிச்சயம் பூர்வ ஜென்ம கர்ம வினைதான். பூர்வ ஜென்ம சாபம்தான். இப்படிப்பட்ட கர்ம வினையை ஜோதிடர் கொடுத்த யந்திரம் 90 நாட்களில் குணப்படுத்திவிடும் என்று எப்படி எதிர்பார்ப்பது. பொறுமை தேவை. 

ஒரே ஜென்மத்தில் அத்துணையும் அனுபவித்துவிட முடியாது. பாவம் செய்யும் போது யோசிக்காமல் அதை அனுபவிக்கும்போது அலறினால் என்ன செய்வது? யார் பாவத்தை யார் வாங்கிக் கொள்ள முடியும்.

சரி, இதற்கு தீர்வுதான் என்ன? நிச்சயம் தீர்வு உண்டு. பரிகாரம் செய்துவிட்டால் மட்டும் பாவம் தீர்ந்துவிடுமா? தள்ளிப்போகும் அவ்வளவுதான். நிச்சயம் பிறிது ஒரு முறை அதை அனுபவித்தே ஆக வேண்டும்.ஒரு சிலர் ஜோதிடத்தைக் கூட தன் இஷ்டப்படி சொல்கிறார்கள். சகட்டு மேனிக்குப் பரிகாரம் சொல்கிறார்கள். அடுத்தவர் கர்மாவில் தலையிடும் நாம் சரியான ஆத்ம பலம் பெற்றுள்ளோமோ என்பதை யோசிக்க வேண்டும். 

ஜோதிடம் சொல்பவர்கள் ஆத்ம சக்தியை அதிகரிக்க வேண்டும். உடலுக்கு கவசம் வேண்டும். உடல் கட்டு வேண்டும். அப்போதுதான் அடுத்தவர் கர்மவினை நம்மைத் தாக்காது.எந்த வகையிலும் ஜோதிடம் ஒரு வழிகாட்டி அதைப் பயன்படுத்தும் வகையில் பயன்படுத்தினால் அதைப்போன்ற ஒரு கலை இந்த உலகில் இல்லை. அதனால் தான் வேதத்தின் ஆறு அங்கத்தில் கண்ணாக இருப்பது ஜோதிடம் ஆகும்.

எல்லா ஜோதிடர்களுக்கும் ஒரு சிறப்பான அனுபவம் ஏற்பட்டிருக்கும். அது என்னவென்றால் பலன் உரைக்கும் போது ஒரு சிலருக்கு மட்டும் அப்படியே நடந்தது, நடந்து கொண்டிருப்பதும, நடக்கப்போவது என மிகத் துல்லியகமாகக் கூறி இருப்பார்கள். அதேபோல் ஒரு சிலருக்கு ஏன் இவருக்கு ஜோதிடம் சொன்னோம் என்றாகிவிடும். காரணம் வந்து கேட்பவர்கள் இறைவனால் உங்கள் மூலம் தீர்வு உண்டு என்று தீர்மானம் செய்திருந்தால் மட்டுமே மிகச் சரியாக இருக்கும்.

அப்படி இறைவனால் அனுப்பப்பட்டவரின் கர்மாவும் ஜோதிடரைத் தாக்காது. இப்படி இறைவனால் அனுப்பப்படாதவர்க்கு நீங்கள் என்ன உரைத்தாலும் விரக்தி மனப்பான்மையே ஏற்படும். இப்படி பலர் அனுபவத்தில் உணர்ந்திருக்கலாம். இப்படி நூற்றில் ஒருவருக்கு பலன் உரைப்பதை மட்டும் கடமையாக்குபவர்களுக்கு ஜோதிடம் தொழிலாகச் செய்வது ஒத்து வராது என்பதும் ஒரு விஷயம்.

அதனால்தான் சித்தர்கள் ஓலைச்சுவடிகளில் எதிர்காலத்தில் இன்னார்க்கு இன்னது நடக்கும் என்ற விபரங்களை பாடல்கள் வடிவில் இலைமறைகாயாக எழுதி வைத்துள்ளனர். அதில் இன்னார்க்கு இன்னது உரைக்கவும், யாருக்கு எந்த நேரத்தில் உரைக்க வேண்டும் என்றும், யார் நாடி தேடி வருகிறார்களோ 

அவர்களுக்கு உரைக்க வேண்டும் என்றும் எழுதி வைத்தனர். அதில் அகத்தியர், காகபுஜண்டர், சப்தரிஷிகள், ஸ்ரீ சுகர், மீனாட்சி நாடி போன்றவை மிகவும் துல்லியமாகவும் இந்த காலத்திற்கு ஏற்ற வகையிலும் ஒத்து வருவதை அனுபவத்தில் உணர்ந்து பார்க்கிறோம். 

இது ஒலைச்சுவடிகள் மூலம் தனது பெயர், நட்சத்திரம், கிரக நிலைகள் ஆகியவற்றைக் கண்டறிந்து பலன் சொல்லும் முறைகள் ஆகும். இதற்கு நாடி ஜோதிடம் என்று பெயர். யார் ஒருவர் நாடி வருகிறார்களோ அவர்களுக்கு உரைக்கும் ஜோதிடத்திற்கு நாடி ஜோதிடம் என்று பெயர்.

எங்கு உண்மை இருக்கிறதோ அங்கு போலிகளும் வருவது இயற்கையே. நல்ல நாடியை நாடிப்போகும் இறைவனின் அருள் நாடி வந்தால் ஒழிய சரியான நாடி கிடைப்பதில்லை. அதனால்தான் பலர் எல்லாம் பொய் என்று வெறுத்து ஒதுக்கும் நிலைக்குத் தள்ளப்படுகின்றனர். அடுத்து பலன் சொல்லும் ஒரு நிலைக்கு நாடி ஜோதிடம் என்று பெயர். இதில் இலக்கினம் தேவையில்லை. குருவையே இலக்கினமாக வைத்து பார்க்கவேண்டும். 

குருபகவான் 12 ஆண்டுகளுக்கு ஒரு முறை தான் நின்ற வீட்டிற்கு வருவார். அதனால் 12, 24, 36,48 ,60 போன்ற வயது காலங்களை முறையாககக் கணித்து மாற்றங்களைக் கண்டு பிடிப்பார்கள். 60 வயதில் ஜெனன ஜாதகத்தில் உள்ள கிரக நிலைகள் அனைத்தும் தான் இருக்குமிடத்திற்கு வரும். அதை மையமாக்கியே அறுபதாம் கல்யாணம் என்றும் சஷ்டியப்த பூர்த்தி என்றும் சடங்கு நடத்தி யாகங்கள் செய்வர். இதை சிலர் 

தவறாக அறுபதாம் கண்டம் என்றும் சொல்வார்கள். அதேபோல் நாடி ஜோதிடத்தில் தொழிலைக் குறிக்கின்ற கிரகம் சனி, மனைவியைக் குறிக்கின்ற கிரகம் சுக்கிரன், தாய்க்கு சந்திரன், தந்தைக்கு சூரியன், கணவனுக்குச் செவ்வாய் என காரகத்துவ அடிப்படையில் நாடி ஜோதிடம் சொல்லும் முறைக்கும் நாடி ஜோதிடம் என்றே பெயர். 

இது ஒரு வகை.

இது இல்லாமல் நாடி வகைகளில் “ஜீவநாடி” என்று ஒன்று இருக்கிறது. ஜீவன் என்றால் உயிர். உயிரோட்டமுள்ள நாடி என்று பொருள். ஏதாவது ஒரு சித்தர்கள் மூலமாக எழுத்துக்கள் தோன்றி பின்பு மறைந்துவிடும். இது சித்தர்கள் மூலமே கிடைக்கும். அதில் குறிப்பாக அகத்தியர், காகபுஜண்டர், ஸ்ரீசுகர் போன்ற ஜீவ நாடிகள் மிகவும் சிறந்த பலனைத் தருகின்றன. அகத்திய ஜீவநாடி என்றால் அகத்திய மகரிஷி தனது அருள்வாக்காக நாடி படிப்பவர் மூலம் அறிவிப்பதாகும்.

அதேபோல் காகபுஜண்டர் தனது சக்தியை நாடி படிப்பவர் உடலில் செலுத்தி தனது எண்ணத்தை ஒலைச்சுவடி மூலம் ஒளி வடிவில், வரி வடிவில் தோன்றி வெளிப்படுத்தி வந்திருப்பவரின் எதிர்காலத்தை உரைப்பார். ஸ்ரீசுகர் மகரிஷியும் அவ்விதமே தனது ஜீவ நாடியில் வெளிப்படுத்துவார். சுகர் மகரிஷி கிளி உருவம் உடையவர். சாதாரண கிளிகளே சீட்டு எடுத்து ஜோதிடம் சொன்னால் சிலருக்கு அப்படியே பலிக்கிறது எனும் போது சாட்சாத் ஸ்ரீசுகர் மகரிஷியே தனது அருள் வாக்கில் உரைத்தால் எப்படி இருக்கும்.

 அகத்தியர் சாதரணமானவர் அல்ல. ஸ்ரீ முருகப் பெருமானிடமே பிரணவ உபதேசம் பெற்றவர். வடக்கு தாழ்ந்து தெற்கு உயர்ந்தவுடன் அத்துனை பேரையும் விடுத்து ஸ்ரீ அகத்தியரை குறு முனிவரைச் சென்று சமன் செய்யுமாறு சிவபெருமான் கட்டளை இட்டார் எனில் அகத்தியர் பெருமையை என்னவென்று சொல்வது. பிரளயகாலத்தில் கூட காகமாக மாறி கல்லால மரத்தில் அமர்ந்து பிரளயம் நடப்பதைப் பார்த்து என்றுமே அழிவில்லாமல் இருக்கும் 

காகபுஜண்டருக்கு வேறு விளக்கம் தேவையா? இப்படி இந்த மூன்று சித்தர்கள் மட்டுமல்லாது உபாசனை மூலம் பல தெய்வங்களும், தேவதைகளும், இன்னும் பல சித்தர்களும் ஜீவ நாடியில் வந்து பதில் சொல்வார்கள். 

இது நம்ப முடியாத அதிசயமாக இருக்கலாம். ஆனால் சத்தியமான உண்மை. ஜீவ நாடி என்பது சித்தர்களது அருள்வாக்கே. அது சுவடி மூலமும் வரும். சுவடி இல்லாமலும் வரும். சுவடி மூலம் வருவது சற்று துல்லியமாக இருக்கும்.

பெரும்பாலும் சித்தர்கள் ஜீவ நாடியில் அறிவிப்பது சூட்சுமமாகவும் இலை மறை காயாகவும் இருக்கும். பலமுறை சுருக்கமான பாடல் வடிவில் எளிமையாகப் புரிந்துக் கொள்ளும்படி வரும். சில சமயம் வெறும் வரைபடங்கள் மட்டும் தோன்றும். இப்படி ஜீவ நாடியை ஜீவனுள்ள நாடியாகப் போற்றி வந்தால் முக்காலமும் சொல்லும். 

ஒரு சிலர் கர்ண எட்சினி போன்ற தேவதைகளை வசியம் செய்து நாடி படிப்பதாகச் சொல்கிறார்கள். அது மாந்தீரீகம் சம்பந்தப்பட்டது. அதற்கு உடலில் அதிக பலம் தேவை. ஆனால் சித்தர்கள் வழியில் ஜீவ நாடி படிப்பது ஒரு சுகானுபவம். உடலும் உள்ளமும் சித்தர்கள் அருளால் ஆட்கொள்ளப்படும்.. அது இன்பத்தையும், ஒர் இனம் புரியாத சுகத்தையும் கொடுக்கும். தெய்வங்களே படிக்கும் ஜீவ நாடிக்கு ஈடு இணையே இல்லை.

அடியேன் அடிக்கடி ஜீவ நாடி பற்றி எழுதுவதால் இதை நீண்ட விளக்கமாக வெளியிட வேண்டும் என்று பல வாசகர்கள் கேட்டுக் கொண்டதற்கு இணங்க இதைத் தொடராக ஒளிவு மறைவு இல்லாமல் எழுதப் போகிறேன். எமது கட்டுரைகளில் எப்போதுமே சத்தியமும், தர்மமுமே இருக்கும் என்பது அனைவரும் அறிந்த ஒன்றே. 

ஸ்ரீ ஞானஸ்கந்தர் ஜீவ நாடி இரகசியங்களை, அதன் திருவிளையாடல்களை, கடந்த 14 ஆண்டுகள் நடந்த அற்புதங்களைத் தொடர்ந்து எழுதுவேன். தன்னிலை விளக்கமாக இது இருக்காது. அனைவரும் இதை அறிந்துக் கொள்ள வேண்டும் என்பதை முன்னிலைப்படுத்தியே சுத்தமான சத்தியமாகவே இருக்கும். பொறுமையாகப் படித்து புரிந்து கொள்ளுங்கள். பல இரகசியங்கள் வெளிவரும். உங்கள் வாழ்க்கை நிலை மேன்மையுறும்