ஜீவநாடி அருளாடல்கள் பகுதி 9

ஆலயப் பரிகாரங்கள் மட்டுமில்லாமல் ஒரு சில மூலிகை மர்மங்களும், அதைப் பயன்படுத்தும் விதமும்
உரைக்கப்பட்டு அந்த மூலிகையை
அணிவதற்குள் ஆயிரம் அதிசயத்தை ஏற்படுத்துகிறது.


ஒரு சிலருக்கு யந்திரங்களை
வைத்து பூஜை செய்யும் முறைகள் வருகிறது. இன்னும் சிலருக்கு
யாகங்கள் செய்யச் சொல்லப்படுகிறது. ஞானத்தில் தெளிந்த நிலை உடையவர்களுக்கு மந்திர
உபதேசமே ஜீவ நாடியில் வருகிறது.

அதை எப்படி உச்சரிப்பது எப்படி பிரயோகம் செய்வது என்பது கூட
ஒரு குரு, உடன் இருந்து கற்றுக் கொடுத்தால் எப்படி இருக்குமோ
அப்படி வருகிறது.

உபாசனை செய்யும் இரகசியங்கள், தேவதைகளோடு
உறையாடும் உயர்வான மார்க்கங்கள் உறுதியான வழிமுறைகள் சொல்லப்படுகின்றன.
இது யாருக்கு பிராப்தமோ அவர்களுக்கே உறைக்கப்படுகிறது.

இன்னும் பாமர மக்களுக்கு மிகச் சுலபமான வழியாக அவர்களது
ஏதேனும் மூன்று பிரச்சினைகளை ஒரு தாளில் எழுதி அவர்கள்
குலதெய்வத்தின் பெயரோடு கொடுத்துவிட, அதை நான் பூஜித்து அவர்கள் குல
தெய்வத்தோடு தொடர்பு கொண்டு  ஆசி  பெற்று ஜீவ நாடியை
இந்த பிரச்சினைகளுக்கு என்ன தீர்வு என சங்கல்பம் செய்து நாடியைப் பிரித்த உடனேயே
உறுதியான தீர்வும், அவர்கள் குலதெய்வம் என்ன
நினைக்கிறது, ஏதேனும் பூஜைகள் செய்ய வேண்டுமா அல்லது தேவை இல்லையா? என பல
விடைகள் கிடைத்து வடிவேல் முருகனின் ஆசியும் கிடைத்து
விடுகின்றன.

இது தான் எளிமையான வழிமுறையாகும்.

கேட்கின்ற கேள்விகள் தொடர்பான விடைகள் மட்டுமில்லாது, இன்னும் சில
கூடுதல் செய்திகளும், சித்தர்கள் மூலமும், முருகப்பெருமான் மூலமும் உணர்த்தப்படும்.

எனவே ஜீவ நாடி என்பது ஒரு நம்ப முடியாத பேரதிசயம்
என்றால் மிகை இல்லை.

கட்டுரையாக்கம்: ஸ்ரீ ஸ்கந்த உபாசகர் ஜெகதீஸ்வரன் சுவாமிகள், ஸ்ரீ ஞான ஸ்கந்த மூர்த்தி கௌமாரபீடம், அந்தியூர்.

சிவபெருமானும் ஒரு தமிழ்ப் புலவரே 

வண்ணச்சரப தண்டபாணி அடிகள் இயற்றிய அறுவகை இலக்கணம்

நூற்பா 70 

சிவபெருமானும் ஒரு தமிழ்ப் புலவரே
பாணனும் தருமியும் பெத்தானும் உய்யப்
பாடியது அன்றிப் பைந்தமிழ்க் கழகத்
தலைவனைப் பழித்தும் தனிக்கவி பகர்ந்த
பரமனும் புலவன் என்பது பண்பே.70

இதன்பொருள்:

பாணபத்திரருக்காக “மதிமலி புரிசை” என்னும் திருமுகப் பாசுரத்தையும், தருமிக்காகக் “கொங்குதேர் வாழ்க்கை” என்ற அகவற் பாவையும், பெத்தான் சாம்பானுக்காக "அடியார்க் கெளியன்” எனத்தொடங்கும் வெண்பாவையும், நக்கீரனை இகழ்வதாக, “அங்கம் குலுங்க” என்னும் ஒரு வெண்பாவையும் பாடியதால் சிவபெருமானையும் ஒரு தமிழ்ப்புலவர் என்பதே முறையாகும் என்றவாறு.

விளக்கம்: 

இவ் வரலாறுகள் திருவிளையாடற் புராணம், புலவர் புராணம் ஆகியவற்றுள் உள்ளன. சிவபெருமானும் தமிழ்ப் புலவனே என்னும் இதே கருத்து இவரால் வேறிடத்தே “அரன்முனாள் தருமி பாணன் அன்புறு பெத்தான் கீரன் தரம்உலகு அறியப் பாடித் தமிழ்க்கவிப் புலவன் ஆனான்”1 எனக் கூறப்பட்டுள்ளது.

நன்றி : பதிவு புலவர்  ஆ.காளியப்பன் அவர்கள், தலைவர், தொல்காப்பியர்  தமிழ்ச்சங்கம்.

நன்றி: சிரவையாதீனம்  தவத்திரு குமரகுருபரர் சுவாமிகள், கௌமாரமடாலயம், கோவை.

ஜீவநாடி அருளாடல்கள் பகுதி 8

பொதுவாக ஆலய பரிகாரங்களே பரிந்துரை செய்யப்படுகிறது.

குறிப்பிட்ட கால இடைவெளியில் தொடர்ந்து சில மாதங்களோ, சில வருடங்களோ ஜீவ நாடி
சொல்கின்ற ஆலயங்களை விடாமல் தரிசனம் செய்ய
வலியுறுத்தப்படுகிறது.

அந்த ஆலய தரிசனத்தை முறையாகச் செய்யும் போது அந்த ஆலயத்தில் ஏதேனும்
அதிசயம் நிகழ வேண்டும்.

அப்படி நிகழும் வரை அந்த ஆலயத்தைத் தொடர்ந்து வழிபட வேண்டும்.

என்ன அதிசயம் எனில் நமது நம்பிக்கைக்கு அப்பாற்பட்டு ஏதேனும் அங்கு நடக்க வேண்டும்.

அப்போதுதான் அந்த இறைவனின் பார்வை நம்மீது விழுந்து
விட்டது என்பதை ஊர்ஜிதம் செய்ய முடியும்.

அதன் பின்பு ஜீவ நாடியில்
அதற்கான சூட்சும இரகசியங்களும், அந்த அதிசயத்தின் முழு செயல்களும்
விளக்கமாக வரும்.

அதன் மூலம் அந்த அதிசயத்தை மனப்பூர்வமாக முழுமையாக
அறிந்து கொள்ளலாம்.

நமது ஜீவ நாடியைப் பொறுத்தவரை ஜோதிடம் சொல்வது போன்று 12
வீட்டின் பலன்களை ஒரே முறையில் சொல்லி விடுவதில்லை.

ஜீவநாடி என்பதே அப்போதைக்கு அப்போது தோன்றி மறைகின்ற எழுத்துக்களை வைத்து
 உரைக்கப்படுவது.

எனவே முருகப்பெருமான் என்ன உரைக்க நினைக்கிறாரோ,
அதை மட்டுமே படிக்க முடியும். நாம் எதிர்பார்த்ததுதான் வர வேண்டும்
 என்று எதிர்பார்க்க முடியாது.

முருகனது எண்ணம் எதுவோ
அதுவே நாடியில் வரும். எனவே குறிப்பிட்ட கால இடைவெளி கழித்து மீண்டும் கேட்க
வேண்டிய தேதியையும் முருகனே நாடியில் உரைத்து விடுவார்.

 அந்த குறிப்பிட்ட காலம் வரை முதல் முறை உரைக்கப்பட்ட
பலன்களையும், பரிகாரங்களையும் கடைபிடிக்க வேண்டும்.

அதில் பல மாற்றங்கள்
ஏற்படுவதை அனுபவத்தில் பார்த்து வருகிறோம்.

அடுத்த முறை எந்த
குறிப்பிட்ட தேதியில் கேட்கச் சொன்னாரோ அப்போது
அடுத்த இரகசியங்களை உரைப்பார்.

மீண்டும்  ஒரு தேதி சொல்லி வரச்
சொல்லுவார். இப்படி மூன்று மாதங்களுக்கு ஒரு முறையோ அல்லது ஆறு மாதங்களுக்கு
ஒரு முறையோ தொடர்ந்து ஜீவ நாடியில் வாக்கு ஒரு
குறிப்பிட்ட நபருக்கு வந்து கொண்டே இருக்கும். எனவே ஒரே நாளில் ஒரே மூச்சில் முழுவதும்
இங்கு உரைக்கப்படுவதில்லை.

அதேபோல் முதல் முறை சொன்ன ஆலயப் பரிகாரங்களை முறையாகக் கடைபிடிக்காமல்
இரண்டாம் முறை பலன் வருவதில்லை.

எனவே ஜீவநாடியில் வருவதை
முழுமனதுடனும், நம்பிக்கையுடனும் கடைப்பிடித்து
வந்தால் முருகப் பெருமானும், சித்தர்களும், நமது வாழ்வில் நடத்தும் அதிசயங்களை
அனுபவிக்கலாம்.

எமது வயது சிறியதானாலும் முருகனது அருள் முழுமையாக
இருப்பதால் இத்தனையும் செய்ய முடிகிறது.

கட்டுரையாக்கம்: ஸ்ரீ ஸ்கந்த உபாசகர் ஜெகதீஸ்வரன் சுவாமிகள், ஸ்ரீ ஞான ஸ்கந்த மூர்த்தி கௌமாரபீடம், அந்தியூர்.

அனைத்துச் சமயங்களும் ஏற்றுச் கொள்ளும் உண்மை 

வண்ணச்சரப தண்டபாணி அடிகள் இயற்றிய அறுவகை இலக்கணம்

புலமை இலக்கணம்   

நூற்பா: 69      
               
                       III. மரபியல்பு

முன்பே கூறப்பட்டது போல இவ் வியல்பு செவிவழிச் செய்திகளை ஆதாரமாகக் கொண்ட தமிழ் இலக்கிய வரலாறு ஆகும். இன்றைய இலக்கிய ஆராய்ச்சியாளர்களில் மிகப்பலர் இவ்வியல்பில் இடம்பெற்றுள்ள பல நிகழ்ச்சிகளை உண்மையாக நடந்த சம்பவங்களாக ஒப்பமாட்டார்கள். எனினும், சென்ற நூற்றாண்டில் தமிழகத்தே புலவர்கள் நடுவே வழக்கிலிருந்த பல செவிவழிச் செய்திகளை அறிய இவ்வியல்பு துணைசெய்யும். இவ் வியல்பின் ஒவ்வொரு நூற்பாவும் ஒவ்வொரு கதையைத் தன்னுள் அடக்கி இருத்தலின் ஒவ்வொன்றையும் விரித்து எழுதினால் இவ்வுரை மிகப் பெருத்துவிடும். எனவே, இதற்குச் சுருக்கமாகவே உரை வரையப்படும். இதில் கூறப்பட்டுள்ள நிகழ்ச்சிகள் அனைத்தையும் ஒரே நூலில் பார்க்க விரும்பும் அன்பர்கள் இந் நூலாசிரியரால் இயற்றப்பட்டதாகிய புலவர் புராணத்தைப் பார்க்கவும். இவ் விலக்கண நூலில் இக் கதைகள் ஒரு தனி அதிகாரமாகக் கூறப்படுவதன் காரணம் இதே இயல்பின் முப்பதாம் நூற்பா உரையிலும் இறுதி நூற்பாவிலும் கூறப்படும் இவ் வியல்பு
முப்பத்தைந்து நூற்பாக்களை உடையது. அனைத்துச்
சமயங்களும் ஏற்றுச் கொள்ளும் உண்மை  தெய்வமும்
புலமைத் திருஉரு வாம்என்று
அறியும் பெரியோர்க்கு அவர்தம் இணையே    69

இதன் பொருள்:

இறைவனும் அறிவு வடிவானவனே எனும் உண்மையை உணரும் பெரியவர்கள் தம் சிறப்பில் இணையற்றவர் ஆவர் என்றவாறு

விளக்கம்:

இறைவன் முற்றறிவன் அல்லது அறிவுமயமானவன் என்பது அனைத்துச் சமயங்களும் ஏற்றுச் கொள்ளும் உண்மையாகும். வாலறிவன் என்றார் வள்ளுவரும்.

நன்றி: பதிவு ஆ.காளியப்பன் அவர்கள், தலைவர், தொல்காப்பியர் தமிழ்ச்சங்கம்.

நன்றி: சிரவையாதீனம் தவத்திரு குமரகுருபரர் சுவாமிகள், கௌமாரமடாலயம், கோவை.

ஜீவநாடி அருளாடல்கள் பகுதி 7

ஜீவநாடியை, குறி சொல்வது போன்று சொல்லப்படும் என்றும்,
மைவித்தை போல் இருக்குமோ என்றும், அந்த நேரத்தில் ஏற்படும்
எண்ணத்தின் வெளிப்பாடோ என்றும், நாடி ஜோதிடம் போன்று ஏற்கனவே எழுதி வைத்து
படிப்பதோ என்றும், அருள்வாக்கு என்றும், ஜோதிடம் சொல்வது
போல சொல்லப்படும் என்றும், எதிர்பார்த்து வருபவர்கள்
ஏமாந்துதான் போவார்கள்.

நமது ஸ்ரீ ஞானஸ்கந்தர் ஜீவ நாடியில், முருகப்பெருமான்,
அகத்தியர், சுகர் மற்றும் காகபுஜண்டர் ஆகியோரால்
உரைக்கப்படும் இரகசியங்கள் ஜோதிடப் பலன் அல்ல.
மாறாகப் பரிகாரம்
உரைக்கப்படுகிறது.

கர்மவினை குறைக்கும் சூட்சுமங்கள்
உரைக்கப்படுகின்றன. ஏனெனில் அடுக்கடுக்காய் ஆயிரம் பலன்கள்
சொன்னாலும் ஒருவர் பொருளாதார ரீதியில் பலன் அடையவில்லை என்றால்
நிறைவு ஏற்படுவதில்லை.

இல்லானை எல்லாரும் வேண்டாம்
என்கிறார்கள். பணம் இல்லாதவனை பரிசுத்தமானவன் என்று இந்தப் பாரினர்
மதிப்பதில்லை.

பணம் இருந்துவிட்டால் அவன் படுபாதகனாக இருந்தாலும்
பக்குவமானவன்,  பரிசுத்தமானவன் என இந்தப் பாரினர் கொண்டாடுகின்றனர்.

எனவே எம்மை நாடி, தேடி, அலைந்து திரிந்து
வந்து ஒரு வழியாக ஜீவ நாடி படித்து விட்டால் அவர் பணக்கார வாழ்வில் ஒரு படி எடுத்து
 வைத்துவிடுகிறார்.

அதன் பின்பு எந்த நிலையில் அவர்
இருந்தாலும் அதிலிருந்து சிறிது சிறிதாக பல மடங்கு தனது வாழ்வில் உயர்வினை அடைந்து
விடுகிறார்.

அதேபோல் தனது கர்மவினையைத் தீர்த்துக் கொள்ளாமல், இருப்பதால்தான்
பணக்கார வாழ்வினையோ, பகட்டு நிலையையோ சுகிக்க இயலாமல்
சுந்தர வடிவை இழந்து சூழ்ச்சியான வாழ்விற்கு பலியாக நேரிடுகிறது.

எனவே முருகப் பெருமானும் சரி, சித்தர்களும் சரி பலன் சொல்ல
விரும்புவதில்லை. பரிகாரம் சொல்லி வாழ்க்கையைச் சரி செய்கிறார்கள்.

ஜாதகத்தையே மாற்றுகிறார்கள். ஜீவ நாடி மூலம் பல இரகசியங்களை உரைத்து, செயல்பாடாத கிரகங்களைச் செயல்பட வைத்து, சீக்கிரத்தில்
சீரான வாழ்வை, சிரமமில்லாத வாழ்வை சித்தரிக்கிறார்கள். இதுதான்  இரகசியம்.

கட்டுரையாக்கம்: ஸ்ரீ ஸ்கந்த உபாசகர் ஜெகதீஸ்வரன் சுவாமிகள், ஸ்ரீ ஞான ஸ்கந்த மூர்த்தி கௌமாரபீடம், அந்தியூர்.

வண்ணச்சரப தண்டபாணி அடிகள் இயற்றிய அறுவகை இலக்கணம்  

   

நூற்பா: 68 

புலமைக்கு உதவாத அத்தனை  தவறுகளையும் களைக
புலமையிற் கரவுதீர் நலம்பு கன்றனம்;
மரபியல்பு அதனையும் வகுக்குதும் அன்றே 68

இதன்பொருள்:

புலமையில் எந்தெந்தத் தீமைகள் களையப்பட்டுச் சிறப்பு உண்டாக வேண்டும் என இதுவரை கூறினாம். இனி அடுத்து மரபியல்பையும் வகுத்துச் சொல்வாம் என்றவாறு.

விளக்கம்:

குற்றங்களைக் காட்டிக் குறைகூறுவது தம் நோக்கமன்று என்பதைக் தெளிவு படுத்துவதற்காக இவ் வியல்பின் முதலில் ‘சாராது ஒழிப்பான் தவறு இயல்பு உரைக்குதும்” எனவும் இங்குக் “கரவுதீர் நலம்” என்றும் கூறினார். அடுத்துவரும் மரபியல்பு பெரும்பாலும் செவிவழிச் செய்திகளை ஆதாரமாகக்  கொண்ட தமிழ் இலக்கிய வரலாறாகவே அமைந்துள்ளது. மொழி இலக்கணத்தில் ஒரு பிரிவாக அம்மொழி இலக்கிய வரலாற்றை எம்மொழியாளரும் எங்கும் கூறியிருப்பதாகத் தெரியவில்லை. இவரே புதுமையாக இவ்வாறு கூறுகிறார். எனவேதான் வகுக்குதும் என்றார்.

இந்நூற்பாவுடன் தவறியல்பு என்னும் இப்பகுதி நிறைவு செய்யப்பட்டு அடுத்த பிரிவாகிய மரபியல்பிற்குத் தோற்றுவாய் செய்துகொள்ளப்பட்டது.

நன்றி: பதிவு புலவர் ஆ.காளியப்பன்அவர்கள்,
தலைவர், தொல்காப்பியர் தமிழ்ச்சங்கம்.

நன்றி: சிரவையாதீனம் தவத்திரு குமரகுருபரர் சுவாமிகள், கௌமாரமடாலயம், கோவை.

ஜீவநாடி அருளாடல்கள் பகுதி 6

நமது ஞானஸ்கந்தர் ஜீவநாடி யாருக்கு பலன் சொல்லுமோ அவருக்கு நிச்சயம் ஏதாவது
ஒரு வழியில் சொல்லியே தீரும்.

எம்மைத்தொடர்பு கொள்பவர்கள் இதைப் புரிந்து கொண்டு பொறுமை காப்பது அவசியம்.

ஐயா நான் ஒரு வருடமாகத் தொடர்பு கொள்கிறேன் படிக்கவே மாட்டேன் என்கிறீர்கள் எனப்  பலர்  தங்களது கருத்துக்களைச்
சொல்கிறார்கள்.

காரணம் இதுதான். உரிய காலம் வரும்போது படித்தால் தான் உண்மை புலப்படும். இல்லாவிடில்
பலன் நடக்காது.

பொதுவாக, நாடி ஜோதிடம் பார்த்தால் சுமார் பத்தாயிரம் முதல்
இருபதாயிரம் வரை பரிகாரம் சொல்கிறார்கள்.

அதே போல் பிறந்த தேதி,
நேரத்தை வாங்கி அதைக் கொண்டு கணினியில் போட்டு, ஜாதகத்தில் உள்ள கிரக நிலைகளைக் கொண்டு, மனப்பாடமாகப் பாடல் வடிவில்
சொல்கிறார்கள் என தனது ஆதங்கத்தை வெளிப்படுத்தினார் ஈரோட்டில் இருந்து என்னைப் பார்க்க  வந்த நபர்.

ஒரு சிலர் சொல்கின்ற பலனைக்
கடைபிடிப்பது எப்படி என்பதில் ஆர்வம் செலுத்துவதில்லை. இவர் எப்படி பலன் சொல்கிறார்
என்பதை மட்டுமே ஆய்வு செய்து ஜோதிடர்களை சோதனை
செய்வது மட்டுமே பணியாகக் கொள்கிறார்கள்.

அதே போல் தான் நாடி என்ற
பெயரில் நடக்கும் மோசடிகளையும் அறியாதவர் இல்லை.

 நமது ஸ்ரீ ஞானஸ்கந்தர் நாடியை அதனால்தான் அனைவருக்கும் உரைப்பது  இல்லை.

காரணம் எவருக்கு பிராப்தம் உள்ளதோ அவருக்கே உரைக்கிறோம்.

அதேபோல இதில் வரும் பரிகாரங்களும் பொதுவாக அன்னதானம், சித்தர்கள்
பூஜை, ஜீவ சமாதி வழிபாடு, ஆலய தரிசனம், மணி, மந்திரம், ஔஷதம் என்கிற முறையில்
தான் வருகிறது.

பரிகாரங்கள் எத்தனை தான் செய்தாலும் அது பலிப்பதும். பலிக்காமல் போவதும்,
அவரவர் கர்ம வினையைப் பொறுத்தே அமைகிறது.

அதேபோல் நாடியில் வரும் பலன்களும் அவரவர் கர்ம வினைப்படியே நடக்கிறது என்பதையும் நினைவில்
வைத்துக் கொள்ள வேண்டும்.

தீதும் நன்றும் பிறர் தர வாரா!

கட்டுரையாக்கம்: ஸ்ரீ ஸ்கந்த உபாசகர் ஜெகதீஸ்வரன் சுவாமிகள், ஸ்ரீ ஞான ஸ்கந்த மூர்த்தி கௌமாரபீடம் அந்தியூர்.